मेरो जीवन

कसैलाई असल होला कसैलाई खराब होला
पढ्छौं भने मेरो जीवन यौटा सिङ्गो किताब होला

कति सहें घाम पानी कस्तो भोगें जिन्दगानी
हाँसीहाँसी पिएँ कति विष भन्ने जानीजानी
अलिअलि आस होला धेरैधेरै सन्ताप होला
पढ्छौं भने मेरो जीवन यौटा सिङ्गो किताब होला

कतिपल्ट बली भएँ कतिपल्ट सुली चढे
आदर्शले जीउँछु भन्दा खेदिएँ म कति लडेँ
कस्तोकस्तो भोग्नुपर्यो त्यसको कहाँ हिसाब होला
पढ्छौं भने मेरो जीवन यौटा सिङ्गो किताब होला

रमेश क्षितिज
(गीति संग्रहः आफैँ आफ्नो साथी भएँ )